കപ്പ ബിരിയാണി

• കപ്പ - ഒരു കിലോ
• ചിരവിയ തേങ്ങ - അര മുറി  
• പച്ചമുളക് - 6 എണ്ണം 
• ഇഞ്ചി - 1 കഷണം 
• ബീഫ് എല്ലോടു കൂടിയത് - ഒരു കിലോ  (എല്ലിലെ മജ്ജ ഉരുകിച്ചേരുന്നതാണ് പ്രധാന രുചിരഹസ്യം. വാരിയെല്ലാണ് ഇതിന് ഏറെ ഉത്തമം. ) 
• മല്ലിപ്പൊടി - 4 ടീസ്പൂണ്‍ 
• മുളകുപൊടി - 4 ടീസ്പൂണ്‍ 
• മഞ്ഞള്‍പ്പൊടി - 1 ടീസ്പൂണ്‍ 
• മീറ്റ് മസാലപ്പൊടി - 2 ടീസ്പൂണ്‍ 
• സവാള വലുത് - 4 എണ്ണം 
• വെളുത്തുള്ളി - 16 അല്ലി 
• ചുവന്നുള്ളി - 8 എണ്ണം  
• കുരുമുളക് - 1 ടീസ്പൂണ്‍ 
• ഗരം മസാല പൊടിച്ചത് - 1 ടീസ്പൂണ്‍ 
• ഉപ്പ് 
• കറിവേപ്പില 
• വെളിച്ചണ്ണ 
• കടുക് - പാകത്തിന് 

തയ്യാറാക്കുന്ന വിധം ബീഫ് കഴുകി പാകത്തിന് ഉപ്പു, 2 ടീസ്പൂണ്‍ മുളക് പൊടി , 2 ടീസ്പൂണ്‍ മല്ലിപ്പൊടി , അര ടീസ്പൂണ്‍ കുരുമുളക് പൊടി , അര ടീസ്പൂണ്‍ മഞ്ഞള്‍ പൊടി എന്നിവ തിരുമ്മി അര മണിക്കൂര്‍ വെക്കുക.  

സവോള , വെളുത്തുള്ളി , കറിവേപ്പില, ഇഞ്ചി ചതച്ചത് എന്നിവയും മീറ്റ് മസാലപ്പൊടി, മല്ലിപ്പൊടി, മുളകുപൊടി, ഗരം മസാല യും കൂടി വെളിച്ചെണ്ണയില്‍ വഴറ്റി തിരുമ്മി വെച്ചിരിക്കുന്ന ബീഫും ചേര്‍ത്തു നന്നായി വേവിച്ചെടുക്കുക. ( 20 മിനുട്ട് മീഡിയം തീയില്‍ കുക്കറില്‍ ) . 

ഇനി കപ്പ ഉപ്പിട്ട് നന്നായി വേവിച്ചെടുക്കുക. കപ്പ വെന്തതിനു ശേഷം വെള്ളം ഊറ്റിക്കളഞ്ഞു വെക്കുക. 

പച്ചമുളക്, മഞ്ഞള്‍പ്പൊടി , ചുവന്നുള്ളി എന്നിവ തേങ്ങയും കൂടി അരച്ചെടുക്കണം. ഈ അരപ്പ് വേവിച്ചു വെച്ചിരിക്കുന്ന കപ്പയില്‍ ചേര്‍ത്തു നന്നായി ഇളക്കി എടുക്കുക. 

എന്നിട്ട് കുറച്ചു കടുകും കറിവേപ്പിലയും താളിച്ച്‌ ചേര്‍ക്കുക. നന്നായി ഇളക്കണം.  

അതിനു ശേഷം വേവിച്ചു വെച്ചിരിക്കുന്ന ബീഫ് , മസാലയോട് കൂടി ഈ കപ്പയില്‍ ചേര്‍ത്തു നന്നായി ഇളക്കി കൂട്ടി കുഴച്ചെടുക്കുക.  നല്ല വാസനയോടു കൂടിയ കപ്പ ബിരിയാണി റെഡി . വാഴയില കിട്ടുമെങ്കില്‍ ചൂടോടെ അതില്‍ വിളമ്പി കട്ടന്‍ ചായയുടെ കൂടെ വൈകുന്നേരം ആകുമ്പോഴേക്കും കഴിക്കാന്‍ പാകത്തിന് ഉണ്ടാക്കി തുടങ്ങിക്കോളൂ..